आइत, पुस ६, २०८१
४ वर्ष पहिले
काठमाडौं, २७ भदौ । प्रहरीले ‘दुर्लभ’ पहेँलो रङ्गको कछुवासहित पाँच जनालाई नियन्त्रणमा लिएको छ । शनिबार (आज) ७०० ग्राम तौल र १२ इन्च लम्बाई भएको पहेँलो रंगको कछुवालाई ३५ लाखमा बेच्नका लागि चितवनबाट काठमाडौं आएका पाँच जनालाई प्रहरीले नियन्त्रणमा लिएको हो ।
शनिबार बिहान महानगरीय अपराध महाशाखा र महानगरीय प्रहरी वृत्त कालिमाटीबाट खटिएको संयुक्त टोलीले सुर्खेतका २५ वर्षीय सर्वराज बुढा, नुुवाकोटका १८ वर्षीय सुुरेन्द्र श्रेष्ठ, काभ्रेका २७ वर्षी सन्तोष रम्तेल, रौतहटका १८ वर्षीय रुपेश तिमल्सिना र नुवाकोटका १९ वर्षीय प्रमोद बाँस्कोटालाई नियन्त्रणमा लिएको हो ।
महानगरीय प्रहरी अपराध महाशाखा प्रमुख दिपक थापाले भने, ‘दुर्लभ कछुवा वा अन्य दुर्लभ पशुपन्छी बेचबिखन हुदैछ, भन्ने सूचना प्राप्त भएसँगै हामीले बिशेष टिम तयार बनाएर पठाइहाल्यौं ।
साढे ११ बजे उनीहरूलाई काठमाडौं महानगर–१४ कलंकी मकालु पेट्रोल पम्प अगाडि छन् भन्ने सूचना पायौं । त्यसपछि महानगरीय प्रहरी बृत्त कालीमाटीका डीएसपी अपील बोहोरा र सोही बृत्त मातहतको महानगरीय प्रहरी प्रभाग कंलकी समेत सक्रिय भए ।’
३५ लाखमा बेच्ने योजनासहित उनीहरु एउटा कछुवा बोकेर चितवनबाट काठमाडौं आएका खुल्न आएको छ । उनीहरुलाई हिरासतमा राखेर कारबाही अघि बढाइएको महानगरीय अपराध महाशाखाका एसएसपी दीपक थापाले बताए । न्युज२४नेपालबाट साभार ।
