बिहि, मंसिर ५, २०८१
४ वर्ष पहिले
अमेरिकी रोग नियन्त्रण तथा रोकथाम केन्द्र (सिडिसी) ले हावाबाट कोरोना भाइरस सर्न सक्ने जनाएको छ ।
सीडीसीका अनुसार कोरोना भाइरस धुवाँजस्तो लामो समयसम्म हावामा रहन सक्ने भएकाले यसको संक्रमण फैलिरहेको छ ।
मेडिकल जर्नल अफ साइन्समा प्रकाशित अध्ययनअनुसार पछिल्लो समय संक्रमितको नजिकबाट भन्दा पनि हावाबाट संक्रमण बढी फैलिरहेको हो । हावामा रहेका भाइरसबाट बढी संक्रमण फैलिदा कसरी संक्रमण भयो भन्ने कुरा थाहा नहुने अनुसन्धानमा उल्लेख गरिएको छ ।
हावाबाट फैलिनेक्रम बढी हुँदा संक्रमण दर बढीरहेको अनुसन्धानकर्ताको दाबी छ । विश्वभर कोरोनाबाट बच्न व्यक्तिगत दूरी कायम गरिए पनि संक्रमण बढ्दै जाँदा अनुसन्धानकर्ताले हावाका कारण बढी फैलिएको पुष्टि गरेका हुन् ।
अनुसन्धानका अनुसार हावामा रहेका भाइरस केही सेकेन्डदेखि केही घन्टासम्म बाँच्न सक्छन् । र, हावाको माध्यमबाट दुई मिटर वा सोभन्दा बढी यात्रा गर्न सक्छन् । हावामा रहेका भाइरस उडेर इन्डोर वा कम भेन्टिलेसन भएका स्थानसम्म पुग्न सक्छन्, जुन अन्य व्यक्तिका लागि जोखिमपूर्ण हुन्छन् ।
पछिल्लो समय हजारौं संक्रमितले श्वास फेर्दा वा हाच्छ्यँु गर्दा निस्कने एरोसेलले हावामा लाखौँको संख्यामा भाइरस हुन सक्ने र सावधानी नअपनाउँदा सजिलै स्वस्थ व्यक्तिमा सर्न सक्ने वैज्ञानिकहरूले चेतावनी दिएका छन् ।
सुरुमा व्यक्तिगत दूरी र भेटघाटलाई संक्रमणको माध्यम मानिएको थियो भने अहिले हावालाई नै संक्रमणको प्रमुख माध्यम मानिएको अनुसन्धानमा उल्लेख छ ।
