असोज-१७, शुक्रबारदेखि गोदावरीस्थित सनराईज सम्मेलन केन्द्रमा सुरु भएको नेकपा एमालेको पहिलो विधान महाधिवेशन आज सम्पन्न भएको छ ।

ललितपुरमा सम्पन्न विधान महाधिवेशनमा राजनीतिक प्रतिवेदनबारे पार्टी अध्यक्ष केपी शर्मा ओली, साङ्गठनिक प्रतिवेदनबारे महासचिव ईश्वर पोखरेल र विधान संशोधन प्रस्तावबारे उपमहासचिव विष्णुप्रसाद पौडेलले जवाफ दिएपछि प्रस्तावलाई सुझाव सहित पारित गरेको छ ।

त्यस्तै विधान महाविधेशनले आगामी १० औं राष्ट्रिय महाधिवेशन सम्पन्न गर्न डा. विजय सुब्बाको संयोजकत्वमा १५ सदस्यीय निर्वाचन आयोग गठन गरेको छ । विधान महाधिवेशनमा अध्यक्ष ओलीले आयोगका संयोजकसहित सदस्यहरूको नाम प्रस्ताव गरेका थिए । राष्ट्रिय महाधिवेशन बुटवलमा हुने एमालले जनाएको छ ।

एमालेको लोगो परिवर्तन

विधान महाविधेशनले एमालेको लोगो परिवर्तन गरेको छ । सूर्यभित्र सीपीएन यूएमएल लेखेर आयाताकार हँसिया हथौडा झण्डा राखेकोमा अहिले सूर्यभित्र हँसिया हथौडा रहने गरी नयाँ लोगो तय गरेको हो ।

माओवादी केन्द्रसँग एकीकरण भएर नेकपा बन्दा पनि यस्तै किसिमको लोगो प्रयोग भएको थियो ।