शुक्र, अशोज १०, २०८१
३ वर्ष पहिले
मंसिर-३,आज शिख धर्मका प्रवर्तक गुरु नानकको ५५२ औं जन्म जयन्ती श्रद्धापुर्वक मनाइँदै छ ।
हरेक वर्ष कात्तिक शुक्ल पूर्णिमाका दिन विश्वभरका शिख धर्मावलम्बीहरुले आफ्नो गुरु, गुरु नानकको जन्म जयन्ती मनाउने गर्दछन् ।
नेपालमा विभिन्न स्थानमा रहेका गुरुद्वारमा आज शिख धर्मालम्बीहरु भेला भई गुरु नानकको जन्म जयन्ती मनाउँदै छन् ।
गुरु नानक जयन्तीका अवसरमा पशुपतिस्थित राजराजेश्वरी निर्मल अखडामा ‘गुरु ग्रन्थ साहिब’ पाठ गराउनाका साथै साधुसन्तलाई भण्डारा गराइने स्वामी गोकुलानन्दले जानकारी दिए। यसैगरी पशुपतिकै भष्मेश्वर, ज्ञानेश्वर र थापाथलीमा रहेको गुरु नानक मठमा पनि विविध कार्यक्रम आयोजना गरी नानक जन्मजयन्ती मनाइने जनाइएको छ ।
गुरु नानकको जन्म विक्रम सम्वत् १५ सय २६ मा पाकिस्तानमा भएको थियो । गुरु नानक धर्मरक्षक र समाज सुधारक थिए ।
धर्ममा भेदभाव नराख्नु उनको विशेषता थियो । उनले समानता, बन्धुत्व, सद्गुणमा आधारित भावनात्मक र सामाजिक आधार सिर्जना गरेका थिए ।
आजको दिनलाई गुरु नानक प्रकासोत्सव र गुरुपर्व पनि भनिन्छ । यस दिन पवित्र ग्रन्थ गुरु ग्रन्थ साहिबको अध्ययन गरेर गुरुपर्वको विधी विधान अनुरुप समापन गरिन्छ ।
