चैत-१५, २०७९ वैशाख ३० गते हुन लागेको स्थानीय तहको निर्वाचनमा सहभागी हुन पाउने चितवनको मतदाताको संख्या तीन लाख ९७ हजार ६ सय ८५ पुगेको छ।

जिल्ला निर्वाचन कार्यालय चितवनले वैशाख २९ गतेसम्म १८ वर्ष पूरा हुने मतदाताको पठाएको नामावली अद्यावधिक गरेर आयोगले अन्तिम नामावली प्रकाशन गरेको हो ।

दोस्रोपटक हुन लागेको स्थानीय तहको निर्वाचनका लागि चितवनमा ८४ हजार ६८२ मतदाता थपिएका हुन् । २०७४ मा भएको निर्वाचनमा तीन लाख १३ हजार तीन मतदाता थिए । तथ्याङ्कअनुसार पछिल्लो पाँच वर्षमा यहाँ २७.५ प्रतिशतले मतदाता संख्या बढेको देखिन्छ ।

भरतपुर महानगरपालिकामा मात्रै पाँच वर्षमा ३५ हजार ४ सय ७८, रत्ननगरमा नौ हजार ४ सय ८८, खैरहनीमा १० हजार २ सय ६८, राप्तीमा १० हजार ६ सय ५१, कालिकामा आठ हजार १ सय ७०, माडीमा छ हजार ६ सय ४७ र इच्छाकामनामा तीन हजार ९ सय ८० मतदाता थपिएका छन् ।

मतदाता थपिएसँगै भरतपुरमा एक लाख ८५ हजार ७ सय ५२, खैरहनीमा ४३ हजार ५ सय ३१ र राप्तीमा ४० हजार ६ सय ४९ मतदाता संख्या पुगेको छ ।

त्यस्तै, रत्ननगरमा ५२ हजार ६ सय ४२, कालिकामा ३१ हजार १ सय ५७, माडीमा २८ हजार ३ सय २० र इच्छाकामनामा १५ हजार ६ सय ३४ मतदाता पुगेका छन् ।