बिहि, अशोज २, २०८१
२ वर्ष पहिले
पुस-२७, काठमाडौंमा जारी पहिलो संस्करणको नेपाल टी–२० लिगको उपाधि विराटनगर सुपर किंग्सलाई २४ रनले पराजित गर्दै लुम्बिनी अल स्टार्सले जितेको छ ।
त्रिवि क्रिकेट मैदान कीर्तिपुरमा बुधबार भएको लो स्कोरिङ खेलमा १३४ रनको लक्ष्य पछ्याएको विराटनगरले निर्धारित ओभरमा ८ विकेट गुमाएर १०९ रनमात्र बनाउन सक्यो ।
विराटनगरका लागि ओपनर अर्जुन साउदले ४० बलमा सर्वाधिक ३४ रन बनाए ।अर्का ओपनर गौरान्सु शर्मा ४ रनमा आउट भए । कप्तान रोहितकुमार पौडेल पहिलो बलमै आउट भए । हुसेन तलात ८ बलमा १३ रनमा रन आउट भए । पृथु बास्कोटाले २९ बल खेल्दै ३१ रन बनाए ।
बलिङमा लुम्बिनीका सागर ढकाल र हर्मित सिंहले समान २–२ विकेट लिए । विपुल शर्मा र किशोर महतोले १ –१ विकेट लिए ।
त्यसअघि टस जितेर पहिला ब्याटिङ गरेको लुम्बिनी १९.२ ओभरमा अलआउट भएकाे थियाे । सुरुवात राम्रो गरे पनि मध्यक्रममा ब्याटरहरुको प्रदर्शन अपेक्षाअनुसारको नहुँदा लुम्बिनी १३३ रनको कमजोर योगफलमा सिमित भयो ।
ओपनरहरु हरमित सिंह र लाहिरु मिलन्थाले ६४ रनको साझेदारी गर्दै सानदार सुरुवात गरेका थिए । हरमित ३० र लाहिरु ४१ रनमा आउट भए । कप्तान दिपेन्द्र सिंह ऐरी २० र इशान पाण्डले १८ रन बनाउँदा बाँकी कसैले पनि दोहोरो अंकको स्कोर गर्न सकेनन् ।
६ जना बलर प्रयोग गरेको विराटनगरका सबैले विकेट लिए । नन्दन यादव र राज ननन्ले २–२ विकेट लिए । हुसेन तलात, केन जोसेफ, सूर्य तामाङ र कप्तान रोहितकुमार पौडेलले समान १ विकेट लिए । सूर्यले ४ ओभर बलिङ गर्दा मात्र ८ रन दिए ।
प्रतियाेगितामा १२ खेलमा २ हार ब्यहाेरेकाे लुम्बिनी च्याम्पियन बन्याे । लिगमा १० मध्ये ८ जितसहित शीर्ष स्थानमा रहेर प्लेअफमा पुगेकाे लुम्बिनीले पहिलाे क्वालिफायरमा जनकपुर राेयल्सलाई पराजित गरी फाइनलमा पुगेकाे हाे ।
उपविजेता बनेकाे विराटनगरले भने इलिमिनेटरमा काठमाडाैं नाइट्सलाई हराएर दाेस्राे क्वालिफायरमा जनकपुरलाई पराजित गरी फाइनलमा पुगेकाे हाे ।
उपाधिसँगै लुम्बिनीले ५५ लाख रूपैयाँ पुरस्कार पाएकाे छ । उपविजेता विराटनगरले ३० लाख रूपैयाँ पुरस्कार पाएकाे छ । तेस्रो भएको जनकपुर रोयल्सले १० लाख र चौथो भएको काठमाडौं नाइट्सले ५ लाख रुपैयाँ पाउनेछ ।
लिगको सर्वोत्कृष्ट खेलाडी घोषित हुसेन तलात ले ५ लाख, उत्कृष्ट ब्याटर चुनिएका हश्मातुल्ला शाहिदले र उत्कृष्ट बलर चुनिएका अभिनाश बोहोराले जनही २ लाख ५० हजार प्राप्त गर्ने छन् ।
त्यसैगरी उदयीमान खेलाडी घोषित सुर्य तामाङले १ लाख ८० हजार प्राप्त गर्ने छन्।
