जेठ-२८, अष्ट्रेलियाले आइसिसी विश्व टेस्ट च्याम्पियनसिप २०२३ को फाइनलमा भारतमाथि सानदार जितका साथ उपाधि जितेको छ । २०२१ देखी सुरु भएको दोस्रो संस्करणको विश्व टेस्ट च्यापियनसिपको फाइनलमा अष्ट्रेलियाले भारतलाई २ सय ९ रनको फराकिलो अन्तरले हराउँदै उपाधि जितेको हो ।

जितको लागि ४ सय ४४ रनको विशाल विजयी लक्ष्य पछ्याएको भारत अन्तिम दिन पहिलो सेसनमै २ सय ३४ रनमा अल आउट भयो । भारतका विराट कोहलीले ७८ बलमा ७ चौकासहित सर्वाधिक ४९ रनमा आउट भए । कोहली स्कट बोलान्डको बलमा पाँचौं दिन सुरुवातमै आउट भएपछि जितको सम्भावना समाप्त भएको थियो ।

अजिंक्या रहाणे १ सय ८ बलमा ७ चौकासहित ४६ रनमा आउट भए । रहाणे मिचेल स्टार्कको बलमा विकेटकिपर एलेक्स केरीबाट क्याच आउट भएपछि भारतको बराबरी सम्भावना पनि समाप्त भएको थियो । शार्दुल ठाकुर डक र उमेश यादव ४ रनमा आउट भए ।

भारतलाई ओपनर शुभमन गिल र रोहित शर्माले ७.१ ओभरमा ४१ रनको साझेदारी गर्दै राम्रो सुरुवात दिलाएका थिए । गिल स्कट बोलान्डको बलमा स्लिपमा क्यामरन ग्रीनबाट उत्कृष्ट क्याच आउट हुँदै पेभेलिएन फर्के । गिलले १९ बलमा २ चौका प्रहार गरे ।

आक्रामक ब्याटिङ गरेका कप्तान रोहित शर्मा ६० बलमा ७ चौका र १ छक्कासहित ४३ रनमा आउट भए । रोहित स्पिनर नाथन लायनको बलमा स्वीप खेल्ने धुनमा मिस हुँदा आउट हुन पुगेका थिए । चेतेश्वर पुजारा ४७ बलमा ५ चौकासहित २७ रनमा आउट भए । उनी प्याट कमिन्सको बलमा क्याच आउट भएका थिए । अष्ट्रेलियाका नाथन लायनले सर्वाधिक चार विकेट लिए । स्कट बोलान्डले तीन, मिचेल स्टार्क दुई र प्याट कमिन्सले एक विकेट लिए ।

त्यसअघि अष्ट्रेलियाले चौथो दिन दोस्रो सेसनमा दोस्रो इनिङ २७०–८ को समयमा समाप्तिको घोषणा गरेको थियो । पहिलो इनिङमा अष्ट्रेलियाले १ सय ७३ रनको अग्रता लिएको हुँदा समग्रमा ४ सय ४४ रनको विशाल लक्ष्य दिएको थियो । अष्ट्रेलियाका विकेटकिपर एलेक्स केरी १ सय ५ बलमा ८ चौकासहित सर्वाधिक ६६ रनमा नटआउट रहेका थिए ।

मिचेल स्टार्क ५७ बलमा ७ चौकासहित ४१ रनमा आउट भए । सातौं विकेटका लागि केरी र स्टार्कले ९३ रनको महत्वपूर्ण साझेदारी गरेका थिए । मार्नस लाबुसेन १ सय २६ बलमा ४१ र क्यामरन ग्रीन २५ रनमा आउट भए । ओपनर डेविड वार्नर १, उस्मान खवाजा १३, स्टिभ स्मिथ ३४ र ट्रविस हेड १८ रन बनाउँदै आउट भए । भारतका रविन्द्र जडेजाले सर्वाधिक तीन विकेट लिए । मोहम्मद शामी र उमेश यादवको नाममा समान दुई विकेट रह्यो ।

भारत पहिलो इनिङमा २ सय ९६ रनमा अल आउट भएको थियो । भारतका अजिंक्या रहाणेले १ सय २९ बलमा ११ चौका र १ छक्कासहित सर्वाधिक ८९ रनको योगदान दिए । शार्दुल ठाकुर १ सय ९ बलमा ६ चौकासहित ५१ रनमा आउट भए ।

सातौं विकेटका लागि रहाणे र ठाकुरले १ सय ९ रनको शतकीय साझेदारी गरेका थिए । रविन्द्र जडेजा ५१ बलमा ७ चौका र १ छक्कासहित ४८, रोहित शर्मा १५, शुभमन गिल १३, विराट कोहली र चेतेश्वर पुजारा समान १४ रनमा आउट भए । अष्ट्रेलियाका प्याट कमिन्सले सर्वाधिक तीन विकेट लिए । मिचेल स्टार्क, क्यामरन ग्रीन र स्कट बोलान्डले समान दुई विकेट लिए । नाथन लायनले एक विकेट लिए ।

त्यसअघि इंग्ल्यान्डको द ओभलमा टस हारेर पहिला ब्याटिङको निम्तो पाएको अष्ट्रेलिया पहिलो इनिङमा ४ सय ६९ रनमा अल आउट भएको थियो । अष्ट्रेलियाका मध्यक्रमका ब्याटर ट्रविस हेडले १ सय ७४ बलमा २५ चौका र १ छक्कासहित सर्वाधिक १ सय ६३ रनको सानदार शतकीय इनिङ खेले ।

हेड मोहम्मद शिराजको बलमा लेग साइडको बलमा एज लागेर विकेटकिपर के एस भरतबाट क्याच आउट भए । स्टिभ स्मिथ २ सय ६८ बलमा १९ चौकासहित १ सय २१ रनमा आउट भए । स्मिथ शार्दुल ठाकुरको बलमा बोल्ड आउट भए । चौथो विकेटका लागि स्मिथ र हेडले ४ सय ८ बलमा २ सय ८५ रनको सानदार दोहोरो शतकीय साझेदारी गरेपछि अष्ट्रेलियाले विशाल योगफल बनाएको थियो ।

विकेटकिपर एलेक्स केरी ६९ बलमा ७ चौका र १ छक्कासहित ४८ रनमा आउट भए । ओपनर डेविड वार्नर ६० बलमा ८ चौकासहित ४३, उस्मान खवाजा डक, मार्नस लाबुसेन २६, क्यामरन ग्रीन ६ र प्याट कमिन्स ९ रनमा आउट भए ।

भारतका मोहम्मद शामीले सर्वाधिक चार विकेट लिए । मोहम्मद शामी र शार्दुल ठाकुरको नाममा दुई दुई विकेट रह्यो । पहिलो संस्करणको फाइनलमा न्युजिल्यान्डले भारतलाई ८ विकेटले हराउँदै उपाधि जितेको थियो ।