शनि, मंसिर ७, २०८१
३ वर्ष पहिले
असोज-७, बुम बुम अफ्रिदीको उपनामले चिनिने पाकिस्तानी क्रिकेटर शाहिद अफ्रिदी चौथो संस्करणको एभरेष्ट प्रिमियर लिग (ईपीएल) क्रिकेट खेल्न नेपाल आइपुगेका छन् ।
शनिबारबाट कीर्तिपुरस्थित टीयू मैदानमा हुने चौथो संस्करणको ईपीएलका लागि पाकिस्तानका अलराउन्डर क्रिकेटर अफ्रिदी बिहीबार काठमाडौं आइपुगेका हुन् ।
त्रिभुवन अन्तर्राष्ट्रिय विमानस्थलमा अफ्रिदीलाई ईपीएलका निर्देशक अमिर अख्तर एवं उनी सम्मिलित टोली काठमाडौं किंग्स इलाभेनका पदाधिकारीहरु स्वागत गर्न पुगेका थिए ।
अफ्रिदी चौथो संस्करणको ईपीएल खेल्न लागेका उच्च प्रोफाइलका खेलाडी हुन् । उनले नेपाल बसाइको क्रममा काठमाडौं किंग्स इलाभेनबाट ललितपुर प्याट्रियट्र्सविरुद्ध र विराटनगर वारियर्सविरुद्ध खेल्नेछन् ।
सिमित ओभरको क्रिकेट खेलमा बिस्फोटक ब्याटिङका कारण बुम बुम अफ्रिदीको उपनामले विश्वमा चर्चा कमाइसकेका अफ्रिदीले विश्वका प्रायःजसो फ्रेन्चाइज प्रतियोगिता खेलिसकेका छन् । ४१ वर्षीय अफ्रिदीले पाकिस्तानबाट २७ टेस्ट, ३९८ एक दिवसीय, ९९ ट्वान्टी–२० अन्तर्राष्ट्रिय, १० इन्डियन प्रिमियर लिग (आईपीएल) र ३३२ ट्वान्टी–२० खेल खेलेका छन् ।
