शुक्र, अशोज १०, २०८१
३ वर्ष पहिले
मंसिर-१९, राष्ट्रिय प्रजातन्त्र पार्टीको अध्यक्षमा राजेन्द्र लिङदेन र महिला महामन्त्रीमा कुन्तीकुमारी शाही विजयी भएका छन् ।
साविक अध्यक्ष कमल थापासँगको कडा प्रतिस्पर्धामा लिङदेनले अध्यक्ष पदमा जित हासिल गरेका हुन् भने महिलातर्फको महामन्त्रीमा नायिका रेखा थापा हराउँदै कुन्तीकुमारी शाही विजयी भएकी छन् ।
पार्टीको चार दिनदेखि जारी महाधिवेशनको अन्तिम दिन हिजो नेतृत्वका लागि चुनाव भएका थियो । उक्त चुनावका भर्खरै प्राप्त नतिजा अनुसार लिङदेनले थापालाई हराउँदै पार्टीको कमाण्ड प्राप्त गरेका हुन् ।
अन्तिम मतपरिणामअनुसार लिङदेनले थापालाई २२७ मतान्तरले पराजित गरे । राप्रपाका झण्डै ४४ सय महाधिवेशन प्रतिनिधिमध्ये ३८ सय ७१ मत खसेकाेमा लिङदेनकाे पक्षमा १८४४ र थापाकाे पक्षमा १६१७ मत आएकाे थियाे । ४३१ मत बदर भएकाे छ ।
त्यसैगरी घोषित मत परिणाम अनुसार कुन्तीले २००८ मत ल्याउँदै विजयी भएकी हुन् । रेखाले १६४० भोट ल्याएकी छन् ।
अध्यक्ष पदमा हारेपछि कमल थापाले फेसबुकमा एक पोस्ट लेख्दै हारको लागि पूर्वराजा ज्ञानेन्द्र शाहमाथि आरोप लगाएका छन् । उनले निर्मल निवासको नांगो हस्तक्षेप भएको भन्दै भत्सर्ना गरेका छन् ।
