बुध, पुस ९, २०८१
१ वर्ष पहिले
भदौ-२६, नेकपा एमालेका उपाध्यक्ष समेत रहेका संविधानसभाका पूर्वअध्यक्ष सुवास नेम्वाङको ७१ वर्षको उमेरमा निधन भएको छ ।
नेम्वाङको निधन भएको एमाले उपाध्यक्ष विष्णु रिमालले सामाजिक सञ्जाल मार्फत जानकारी दिएका हुन् ।
प्रतिनिधि सभा सदस्य समेत रहेका नेम्वाङको हृदयघातका कारण सोमवार राति झण्डै साढे २ बजेको समयमा निधन भएको नेकपा एमालेका नेताहरुले जनाएका छन् ।
बालुवाटार स्थित निवासमा हृदयघात भएलगत्तै उनलाइ महाराजगञ्ज स्थित त्रिवी शिक्षण अस्पतालमा लगिएकोमा चिकित्सकहरुले मृत घोषणा गरेका थिए ।
‘घरमै हृदयघात भएका सुवास नेम्वाङलाई अस्पताल ल्याएपछि राति साढे २ बजे चिकित्सकले मृत घोषणा गरेछन्’ त्रिवी शिक्षण अस्पतालमा रहेका रिमालले भने । नेम्वाङको निधनपछि एमाले नेताहरु शिक्षण अस्पताल पुगेका छन् ।
२०७९ सालको प्रतिनिधि सभा निर्वाचनमा इलामबाट विजयी नेम्वाङ नेकपा एमाले संसदीय दलका उपनेता थिए ।
२०७९ फागुन २५ गते भएको राष्ट्रपति निर्वाचनमा एमालेको तर्फबाट प्रत्यासी थिए ।
२०६३ सालमा सम्पन्न जनआन्दोलनबाट पुनस्थापित प्रतिनिधि सभाको सभामुख बनेका नेम्वाङ त्यसपछि २०६४ र २०७० सालको संविधान सभाका अध्यक्ष थिए ।
वरिष्ठ अधिवक्ता समेत रहेका नेम्वाङ प्रतिनिधि सभाको सार्वजनिक लेखा समितिको सभापति समेत बनेका थिए ।
