इण्डियन प्रिमियर लिग (आईपीएल) अन्तर्गत हिजो राती सम्पन्न सेख ज्यायद क्रिकेट स्टेडियममा दिल्ली क्यापिटल्सले सनराइजर्स हैदराबादलाई १७ रनले पराजित गर्दै आइपिएल इतिहासमा पहिलो पटक फाइनलमा स्थान बनाउँदै इतिहास रचेको हो ।

टस जितेर पहिले ब्याटिङ गरेको दिल्लीले निर्धारित २० ओभरमा तीन विकेट गुमाउँदै १८९ रन बनायो । दिल्लीका लागि शिखर धावनले अर्धशतकीय पारी खेले ।

५० बल खेलेका उनले ६ चौका र २ छक्काको सहयोगमा ७८ रनको योगदान गरे । त्यस्तै सिमरन हेटमायरले ४२ रन बनाउँदा मार्कुस स्टोइनिसले ३८ रनको योगदान गरे ।
बलिङतर्फ हैदरावादका लागि सन्दीप शर्मा, जेसन होल्डर र साशिद खानले समान एक–एक विकेट लिए ।
१ सय ८० रनको लक्ष्य पछ्याएको हैदराबादले २० ओभरमा ८ विकेट गुमाउँदै १ सय ७२ रन बनाउन सक्यो ।
सनराइजर्स हैदराबादका लागि मध्यक्रमका केन विलियम्सनले ४५ बलमा ५ चौका र ४ छक्का सहित सर्वाधिक ६७ रनको योगदान दिएपनि टोलीलाई जिताउन सकेनन् । हैदराबादका लागि अब्दुल सामदले ३३ रन ,गर्गले १७ रन र मनिष पान्डे २१ बाहेक अन्य खेलाडिले आवश्यक रन बनाउन सकेन् ।
बलिङतर्फ दिल्लीका लागि कागिसो रबाडाले ४ , मार्कस स्टोइनिसले ३ र अक्षर पटेलले १ विकेट लिए ।
यो जितसंगै दिल्लीले उपाधिको लागि फाइनलमा मंगलबार मुम्बई इन्डियन्ससँग खेल्ने छ ।