बिहि, पुस १०, २०८१
४ वर्ष पहिले
मंसिर -२४,राष्ट्रिय मानव अधिकार आयोगले विप्लव समूहद्वारा मोरङको मिक्लाजुङका शिक्षकको हत्यामा संलग्नलाई कारबाही गर्न माग गरेको छ ।
उक्त घटनाको विरोध गर्दै आयोगले दोषीलाई कारबाही गर्न माग गरेको हो ।
बुधवार आयोगका प्रवक्ता डा. टीकाराम पोखरेलद्वारा जारी विज्ञप्तिमा आफ्ना राजनैतिक विचारहरु अभिव्यक्त गर्ने, विना हातहतियार भेला हुने, शान्तिपूर्ण रुपमा प्रदर्शन गर्न पाउने तथा असहमतिहरुलाई शान्तिपूर्वक व्यक्त गर्न पाउने हक पनि प्रत्येक नागरिकलाई संविधानले सुनिश्चित गरेको जनाएको छ ।तर आफ्ना विचारहरुमा असहमति राख्नेप्रति असहिष्णु भई हत्या–हिंसा नगर्न र प्रत्येक व्यक्तिको जीवनको अधिकारको सम्मान गर्न समेत विप्लव समूहलाई आग्रह गरेको छ .
साथै कुनै पनि व्यक्तिलाई विचार आस्था र आशंकाको आधारमा स्वेच्छाचारी रुपमा पक्राउ गर्ने र यातना दिने कार्य नगर्न, उक्त घटनामा संलग्न दोषीलाई कानूनी दायरामा ल्याउन तथा पीडित परिवारलाई उचित क्षतिपूर्ति उपलब्ध गराउन आयोगले सरकारसँग माग गरेको छ ।
मंगलवार विहान मोरङ मिक्लाजुङ–१ को सरस्वती माध्यमिक विद्यालयका प्रधानाध्यापक राजेन्द्रकुमार श्रेष्ठको हत्या भएको थियो ।
मृतक श्रेष्ठको बुधवार (आज) धरानस्थित वीपी कोइराला स्वास्थ्य विज्ञान प्रतिष्ठानमा शव पोष्टमार्टमको लागि लगिएको छ ।
