आइत, कार्तिक २४, २०८१
४ वर्ष पहिले
माघ-११, भारतको उत्तराखण्ड राज्यमा १९ वर्षीय किशोरी मुख्यमन्त्री हुने भएकी छन् । हरिद्वारकी श्रृष्टि गोस्वामी एकदिनका लागि मुख्यमन्त्री बन्ने भएकी हुन् ।
उनी आइतबार (आज) का लागि मुख्यमन्त्री बन्ने बताइएको छ ।
गोस्वामीलाई उत्तराखण्ड सरकारले नै एक दिनको मुख्यमन्त्री बनाउन लागेको हो । २४ जनवरीमा राष्ट्रिय बालिका दिवसको अवसरमा सृष्टिलाई उत्तराखण्डको एक दिनको मुख्यमन्त्री बनाउन लागिएको उत्तराखण्ड बाल अधिकार संरक्षण आयोगकी अध्यक्ष उषा नेगीले जानकारी दिएकी छन् ।
सृष्टिले कार्यकारी अधिकारसहित मुख्यमन्त्री बन्नेछिन् र उनको उपस्थितिमा विधानसभा बैठक पनि बस्नेछ । विधानसभाको कोठा नम्बर १२० मा बैठक बस्नेछ । सृष्टिलाई मुख्यमन्त्री बनाएर बैठक आयोजना गर्ने स्वीकृति र निर्देशन उत्तराखण्डका मुख्यमन्त्री त्रिवेन्द्र सिंह रावतले दिइसकेका छन् ।
यो एक दिनको कार्यकालमा सृष्टिले विकास कार्यक्रमको समीक्षा गर्नेछिन् । यसका लागि छानिएका विभागका अधिकारीले ५–५ मिनेटको समयमा आ–आफ्नो रिपोर्ट पेश गर्नेछन् । विधानसभा आइतबार दिउँसो १२ बजेदेखि ३ बजेसम्म चल्नेछ ।
